Namaz Ve Dua

NA'T-I ŞERÎF Sultân-ı kevneyn doğduğu Mâh-ı mübârekdir gelen 'Âlem münevver olduğu Ol mevlid ayıdır gelen Dâim Hakk'ı zikr eylegil İhsânını fikr eylegil İn'âmına şükr eylegil Mâh-ı mübârekdir gelen Ma'mûr iken mülk-i beden Kasd et kazan hulk-ı hasen Ey Hakk'ı bulmak isteyen Mâh-ı mübârekdir gelen Geldi çün ol hayrü'1-enâm Oldu müşerref hâss ü âmm Hakk'dan ana bin bin selâm Mâh-ı mübârekdir gelen Envâra er etvâra er 'İrfâna er esrâra er Kasd et Hüdâyî yâra er Mâh-ı mübârekdir gelen Azîz Mahmûd Hüdâyî Kaddesallahu Sırrahu'l-Âlî

NA'T-I ŞERÎF İki cihân sultânının Doğduğu ay geldi yine 'İlm ü ma'ârif kânının Doğduğu ay geldi yine Gelsin şefâ'at isteyen Bulsun safâ anı seven Ol sâhib-i hulk-ı hasen Doğduğu ay geldi yine Bedri'd dücâ şemsi'd-duhâ Verd-i gülistân-ı Hudâ Hakk'ın Habîbi Mustafâ Doğduğu ay geldi yine Bir âşık-ı sâdık kanı Râhat bula cân ü teni Sırr-ı hakîkat mahzeni Doğduğu ay geldi yine Anı Hüdâyî kim sever Matlûba bulmuşdur zafer Fahr-i cihân hayrü'l-beşer Doğduğu ay geldi yine Azîz Mahmûd Hüdâyî Kaddesallahu Sırrahu'l-Âlî

NA'T-I ŞERÎF Elâ ey gevher-i kân-ı risâlet Sana bin bin salât ile tahiyyet Hakîkat bâğının serv-i bülendi Gül-i sadberg-i gülzâr-ı sa'âdet "Fe kâne kâbe kavseyni ev ednâ" 'Uluvv-i şânına eyler şehâdet Nebîler gerçi halkı da'vet edüp Kamusu etdiler irşâd-ı ümmet Velî sen geçüp ef'âl ü sıfâtı 'İbâdı etdin asl-ı zâta da'vet Anınçün hâtem oldun enbiyâya Seninle bitdi bünyân-ı nübüvvet Habîbâ ger Halîl olduysa ceddin Sen oldun kutb-ı eflâk-ı muhabbet İki şakk oldu mâh engüştün ile Çü gördü sende nûr-ı şems-i vahdet Meded eyle Hüdâyî derdmende Şefâ'at yâ Resûlallah şefâ'at Azîz Mahmûd Hüdâyî Kaddesallahu Sırrahu'l-Âlî

NA'T-I ŞERÎF Eyâ rehnümâ-yı gürûh-ı kirâm 'Aleyke's-salâtü 'aleyke's-selâm Seninle bulundu tarîk-i hüdâ Seninle bilindi sıyâm ü kıyâm Habîb-i Hudâ'sın sivâdan ne gam Güneşden sakınsa 'aceb mi gamâm Nice nâkıs etdi çü burhân taleb O dem bedrin etdin işini tamâm Hüdâyî garîbe şefâ'at meded Sana çünki Mahmûd olupdur makâm Azîz Mahmûd Hüdâyî Kaddesallahu Sırrahu'l-Âlî

NA'T-I ŞERÎF Ey Resûl-i Mustafâ vü Müctebâ V'ey Habîb-i Murtazâ vü Muktedâ "Küntü kenz" esrârının miftâhısın Zât-ı pâkin mazhar-ı tâmm-ı Hudâ 'Arş-ı a'zam cilve-gâh iken sana Seyrine Sidre ola mı müntehâ "Lev denevtü" deyicek Rûhü'l-emîn Sen revân oldun pes ey Hayrü'l-verâ Bârgâh-ı vahdete erdin hemîn Kaldı Mevlâ gitdi cümle mâsivâ Böyle bir nûr etdi neslinden zuhûr Tan mı İsmâîl ederse cân fedâ N'ola eylersen Hüdâyî'ye nazar Ceddim ü pîrimsin ey kân-ı 'atâ Azîz Mahmûd Hüdâyî Kaddesallahu Sırrahu'l-Âlî