Namaz Ve Dua

NUTK-İ ŞERÎF 'Aşk çün perdeden 'ayân oldu Mâsivâ-yı Hudâ nihân oldu Çekdi 'uşşâkı mülk-i ıtlâka 'Aşk minhâc-ı 'âşıkân oldu Dîde-i 'âşıkın ziyâsı 'aşk Hüsn-i dilberde 'aşk ân oldu Tâ bilindi hakîkat-i eşyâ Her varak defter-i beyân oldu Zerre mihr-i cihân-fürûz oldu Katre 'ummân-ı bî-kerân oldu Zerreden tâ varınca hurşîde Mazhar-ı zât-ı gaybdân oldu Erdi Hakk'dan nesîm-i vahdet-i zât Pîr-i hum-geşte nevcivân oldu Kâmil oldu tılsım-ı genc-i vücûd Cism-i hâki karîn-i cân oldu Nûş edenler Sabûhî câm-ı meyi Mest ü bî-hûş-ı câvidân oldu 'Aşk u ma'şûk u 'âşık oldu yâr Leyse fi'd-dâri gayruhû Deyyâr Sabûhî Ahmed Dede Kuddise Sırruh

NUTK-İ ŞERİF Ey tılsım-ı hazîne-i envâr V'ey muhît-i cevâhir-i esrâr Ey zemîn ü zamâne maksûdu V'ey güzîn-i netîce-i her-kâr Sen seni bil ki mazhar-ı küllsün Sensin âyîne-i ruh-ı dildâr Eyle halvet-serây-ı hâssa duhûl Gezme bîgâneler gibi zînhâr Varlığın sedd-i râh-ı ma'nîdir Varı yok eyle kim ola yok var İ'tibâr-ı vücûda verme vücûd Koma mir'ât-ı dilde jeng ü gubâr Çeşm-i Hak-bîn-i pür-safâ kesb et Nice bir gözde perde-i pindâr Ayn-ı vahdetle kıl cihâna nazar Bir görünsün gözüne her ne ki var Bir hakîkatdir ey Sabûhî kamu 'Aks-i mir'ât-ı dîde vü dîdâr 'Aşk u ma'şûk u 'âşık oldu yâr Leyse fi'd-dâri gayruhû Deyyâr Sabûhî Dede el-Mevlevî Kuddise Sırruh

NUTK-İ ŞERÎF Sâlik isen tarîk-i vahdete ger Dâmen-i 'aşkı tut odur rehber Kime sunulsa sâgarı 'aşkın Anı mest-i cemâl-i dilber eder 'Aşkdır bir muhît-i a'zam kim Anın emvâcıdır nukûş u suver 'Aşk bir zâtdır velî her dem Nice bin kesret ile cilve eder Gâh îmân olur gehî inkâr Gâh Birâhim olur ü gâh Âzer Gâh dervîş olur gehî sultân Gâh Dârâ olur geh İskender Gâh envâr-ı Ahmed-i Ümmî Gâh esrâr-ı sîne-i Hayder Gâh olur nâtık-ı sühan-ârâ Gâh nutk-ı Sabûhi-i kemter Görmeğe her libâs ile anı Ey Sabûhî kanı bir ehl-i nazar 'Aşk u ma'şûk u 'âşık oldu yâr Leyse fi'd-dâri gayruhû Deyyâr Sabûhî Ahmed Dede Kuddise Sırruh