Hayli Müddetdir Gam-ı Âh-ı Nedâmet Bekleriz

NUTK-İ ŞERÎF

Hayli müddetdir gam-ı âh-ı nedâmet bekleriz

Hânedân-ı 'aşkda künc-i selâmet bekleriz

Şâm-ı firkatde düşüp subh-i kıyâmet bekleriz

Nice yıllardır ser-i kûy-i melâmet bekleriz

Leşker-i sultân-ı 'irfânız velâyet bekleriz

Bahr-ı 'aşkında gönül emvâceden itme hazer

'Aşkda her kimse başdan geçmese bulmaz zafer

Bağlarız meyhânede sevdâ-yı hüsnünde kemer

Sâkin-i hâk-i der-i meyhâneyiz şâm u seher

İrtifâ'-ı kadr için bâb-ı sa'âdet bekleriz

Râhat olmaz gîceler gamdan dili-i meklûbumuz

Kan döküp sahrâ-yı gamda dîde-i meskûbumuz

Zevk-i 'aşk-ı yârdan gayrı değil mahbûbumuz

Cîfe-i dünyâ değil kerkes gibi matlûbumuz

Bir bölük ankâlarız kâf-ı kanâ'at bekleriz

Şükrülillah mahrem olduk mahzen-i esrârdan

Rûşen oldu dîde-i giryânımız dîdârdan

Uyku görmez çeşmimiz sevdâ-yı 'aşk-ı yârdan

Hâb görmez çeşmimiz endîşe-i ağyârdan

Pâsbân-ı genc-i esrâr-ı muhabbet bekleriz

Kays idüp sahrâya saldı gayret-i 'aşkın bizi

Mest-i şeydâ eylemişdir şiddet-i şevkin bizi

Dûr idüp zevk-i cihândan lezzet-i zevkin bizi

Sûret-i dîvâr edüpdür hayret-i 'aşkın bizi

Gayr-i seyr-i bâğ ider biz künc-i mihnet bekleriz

'Âşıkız envâr-ı hüsnün mazhar-ı dilde görüp

Mesken-i me'lûfumuzdan hüsnünü seyre gelüp

Tâlibân-ı genc-i 'aşkız cevher-i cândan geçüp

Kârvân-ı râh-ı tecrîdiz hatar havfın çeküp

Gâhi Mecnûn gâhi biz devr ile nevbet bekleriz

Sanma zâhid bî-eserdir dîde-i giryânımız

'Aşkdan hâlî değildir sîne-i büryânımız

Âteş-i 'aşk ile yanmış hâtır-ı nâlânımız

Sanmanız kim gîceler bî-hûdedir efgânımız

Mülk-i 'aşk içre hisâr-ı istikâmet bekleriz

Berk-ı hüsnünden nigârâ şu'le dünyâyı tutup

Şöhret-i âvâz-ı 'aşkın kûh u sahrâyı tutup

Hâlis-i şeydâ tarîk-ı 'aşkda kanlar içüp

Yattılar Ferhâd ü Mecnûn mest-i câm-ı 'aşk olup

Ey Fuzûlî biz olar yattıkça nevbet bekleriz

Abdurrahman Hâlis Talebânî Hazretlerinin Fuzûlî'nin bir gazeline yaptığı tahmîsdir.